BBC documentary tihchhuah vanga zirlai man 13-te la chhuah lo

BBC-in kum 2002 Gujarat intualvuakna thleng chungchang documentary a siam an chhuah avanga Jamia Millia Islamia zirlai 13 mante chu police-ten an la chhuah lo tih Students Federation of India (SFI) chuan a sawi.

He documentary-ah hian Gujarat intualvuakna thlenga hetih hunlaia Gujarat chief minister, tuna prime minister ni ta Narendra Modi chungchangte tarlan tel a nih avangin sorkar laipui chuan tihchhuah a lo khap tawh a ni. Social media platform hrang hrangah pawh documentary, 'India: The Modi Question' link chu block vek turin a lo hrilh tawh bawk.

Nilaini khan University zirlaiten he documentary hi tihchhuah an tum thu an sawi hnuah, mi eng emaw zat man an ni. An zinga a tam zawk chu Nilaini tlai khan chhuah leh nghal ni mah se, mi 13 erawh police-ten an la hreng zui. Zirlai hren zingah hian SFI Jamia unit secretary Azeez leh SFI south Delhi area vice prsident Nivedy-te pawh an tel.