Chhattisgarh sorkarin ṭhalai hna nei lote allowance pe dawn

Chhattisgarh chief minister Bhupesh Baghel chuan financial year thar aṭangin, an state-a ṭhalai hna nei lote chu thla tin allowance pek an ni ṭhin dawn tih a puang.

Hei hi kum 2018 assembly inthlan dawna Congress party-in a tiam zinga pakhat a ni, hemi kuma inthlanah hian Congress chuan hnehna changin, kum 15 hnuaha sorkarna an siam leh a ni.

CM Baghel chuan nimina Republic Day an lawmnaah hei hi sawiin, " 2023-24 financial year aṭangin ṭhalai, hna nei lo te chu thla tin allowance pek an ni ang," a ti a, mahse an pek zat tur erawh a sawilang lo.

Centre for Monitoring Indian Economy (CMIE)-in nikum November thlaa data a tihchhuahah, Chhattisgarh hi India ram state zingah unemployment rate hniamna ber a ni. CMIE data chuan kum 2018, May -August thlaa Chhattisgarh state-a unemployment rate hi 3.22% a nih laiin, nikum November thlaah chuan 0.1% ah a tlahniam tawh tih a tarlang.