Sorkarin BBC documentary a khap chungchang media group-te'n sawisel

BBC-in kum 2002 Gujarat intualvuakna thleng leh, prime minister Narendra Modi (he thil thlen laia Gujarat Chief Minister) chungchang documentary a siam chu BJP kaihhruai sorkar laipui chuan tihchhuah a khap a, social media lama online link dahte pawh la thla tur leh block vek turin Twitter leh YouTube pawh a lo hriattir tawh bawk.

BJP sorkarin BBC documentary, 'India : The Modi Question' tihchhuah a khap hi khawvela media watchdog hrang hrang chuan sawiselin, PM Modi kaihhruai sorkar chu IT Rules hnuaia emergency power dik lo taka hmangah an puh.

Narendra Modi-a Gujarat chief minister a nih lai, kum 2002-a Godhra-a intualvuakna rapthlak tak thlengah hian mi 1,000 vel an thi a, thi zinga a tam ber hi Muslim an ni. Human rights activist-te chuan thi zat hi 2,500 an tling niin an sawi thung.

BBC-in documentary a siamah PM Modi demna te a tel avangin sorkar laipui chuan na takin a sawisel nghal a, ramchhunga tihchhuah a khap zui bawk.

International Press Institute (IPI) chuan BJP sorkarin emergency law hmanga documentary chhuah a khap chuan a ṭhawng hle tih sawiin, hetianga a pumpuia khap ngawt loin India IT Rules chuan online content an duh lohte censor turin sorkar chu phalna a pe a ni, a ti. "Modi-a sorkar hian a policy sawiseltute hrem leh khuahkhirhna atan IT Rules hnuaia emergency power hi chiang takin a hmangsual a ni," tiin IPI director of advocacy Amy Brouilette chuan a sawi.

Committee to Protect Journalists (CPJ) pawhin social media platform-te documentary link block tura thu pek chu media mite zalenna beihna, sorkarin democracy thuthlung a vawng nung zel nia a insawi letling chiah a ni, an ti. CPJ Asia programme coordinator Beh Lih Yi chuan documentary tihchhuah khapna a siam chu hlip nghal tura sorkar an phut thu a sawi a ni.

Internet Freedom Foundation watchdog policy director, Prateek Waghre chuan content ṭhenkhat khuahkhirh ngaite chu a awm pawh a ni thei a, mahse India ram thil kalpui a nih dan chu a nasa lutuk niin a sawi. "Thuneitu lam aṭangin thil te thamah pawh inhrekbehna an kalpui nasa a, hei hi ngaihtuah a ngai khawp mai," tiin civil society leh media lamte chuan aw chhuah theihna hmun pawh an nei zim sâwt tawh hle a ni, a ti.