Gujarat lei chim chungchanga chargesheet thehluhah 0Lei cheiṭhatu firm hotu mawhphurtu berah puh

Mi 135-te thih phahna, Gujarat-a Morbi lei chim chungchanga chargesheet chu thla thum dawn a liam hnuah thehluh a ni. Chargesheet-ah hian chhiatna thlengah hian lei cheiṭhat hna thawktu firm, Oreva Group promoter leh Ajanta Manufacturing Limited managing director Jaysukh Patel chu mawhphurtu berah puh a ni.

Lei a chim hnuah Jaysukh Patel hi chin hriat lohin a bibo zui a, kar liam taa manna tur thupek tihchhuah a ni. January 16 khan court-ah anticipatory bail a lo dil lawk tawh bawk.

Chargesheet thehluth hi phek 1,262 zeta chhah a ni.

Ajanta brand hnuaia wall clock siam ṭhin,Oreva Group hi kum 100-a upa, Machchhu lui chunga lei cheiṭhat hna leh enkawl zui hna thawk tur hian thlan a ni. Lei an chei hnuah, mipuite tlawh theih tura an hawn aṭanga ni li hnu, nikum October 30 khan lei hi a chim a, mi tam takin nunna an chan phah a ni.

Gujarat sorkar chuan lei chim chungchang chhui tur hian special investigation team (SIT) a din a ni. SIT hian an thil chhuinaah, Oreva Group-in lei cheiṭhat hna an thawhnaah thil fel tawk lo eng emaw zat an hmuchhuak a, hei bakah hian lei hawn hunah ṭum khatah leia kal thei zat tur bithliah siam a awm lo a, ticket hralhchhuahnaah pawh bithliah siam a ni lo bawk tih an sawi. Lei chim lai hian leiah hian mi 300 vel an awm niin police-te chuan an sawi.

Forensic Science Laboratory (FSL) report chuan lei cheiṭhatna tura hmanrua hmante chu a thar ni loin, a hluite an nih thu a sawi a, cable-te pawh a tuiek nasa a, lei kilhna thawl tawhte pawh khawih tel an ni lo tih a tarlang bawk.

He chhiatna thleng kaihhnawihah hian mi pakua man an ni tawh a, an zingah hian sub-contractor, ticket clerk leh security guard-te an tel.