Omar Abdullah-a'n Bharat Jodo Yatra a zawm

National Conference (NC) hruaitu leh Jammu and Kashmir chief minister hlui, Omar Abdullah chuan nimina Rahul Gandhi kaihhruaia Banihal-a Bharat Jodo Yatra neih chu a zawm ve. Hruaitu pahnihte hian khawvawt tak hnuaia an kalnaah hian t-shirt an ha ve ve a ni.

Omar Abdullah chuan yatra neih chu Congress hruaitu, Rahul Gandhi hming tihṭhat tumna atana neih a ni lo a, mahse ram chhung dinhmun siamṭhatna tura an neih a ni zawk tih a sawi. Ram dinhmun chu a ngaihtuah avanga yatra pawh chu zawm ve a nih thu a sawi bawk.

NC hruaitu chuan Gandhi hian ama mimal tana yatra hi nei a ni lo a, mahse ram chhunga inthliarna nasa tak awm te, minority-te beihna thleng ṭhinte a vei avangin a buatsaih zawk a ni, a ti. "Sorkar laipui chuan Arab ramte chu ṭhiana siam a duh a, mahse sorkarah India ram chhunga minority lian ber aiawh erawh tumah an awm ve lo," a ti. India ram independence hnua Lok Sabha leh Rajya Sabha-a Muslim community aiawh pakhat pawh an awm loh ṭum khatna a nih hial a rin thu sawiin, hei hian BJP riltu a tilang a ni, a ti.