Rahul Gandhi-a'n Sringar-ah India flag pawtparh; Vawiinah Bharat Jodo Yatra kharna neih a ni dawn

Congress party hruaitu Rahul Gandhi chuan Bharat Jodo Yatra kal tawpna ni, nimin khan Srinagar-a Lal Chowk-a clock tower-ah India flag a pawtpharh.

Kanyakumati, Tamil Nadu aṭanga Jammu and Kashmir kea kal thlengtu, Rahul Gandhi hian nimin khan Srinagar-a Maulana Azad Road-a Pradesh Congress Committee headquarters-a minute 30 vel a chawlh hnuah clock tower, tualchhung mite'n 'Ghanta Ghar' tia an sawi hi panin, India flag a pawtpharh. Rahul hian kum 75 liam taa Jawaharlal Nehru-a'n India flag a lo pawhparhna hmunah ngei a pawtpharh ve leh ta a ni.

Gandhi hi a farnu, Congress general secretary Priyanka Gandhi Vadra bakah J&K-a party hruaituten an ṭawiawm.

Clock tower-a India flag pawtpharhnaah minute 10 vel hun hman a ni a, venhimna pawh khauh taka kalpui niin, a chhehvela dawr leh sumdawnna bakah flea market-te pawh khar tir vek an ni.

Vawiin hian Srinagar-ah Bharat Jodo Yatra kharna neih a ni dawn a, he hunah hian Congress party bakah political party dang 12 chuan an tel dawn tih an sawi. Congress chuan party 21-te an sawm a, mahse party ṭhenkhat chuan venhimna lam venthawn vangin an kal thei lo tih an sawi.

Rahul Gandhi hian Bharat Jodo Yatra hi September 7 khan Kanyakumari, Tamil Nadu aṭangin a nei ṭan a, January 30-ah Srinagar-ah a tawp ta a ni. Ni 137 chhung kea kalin, state 12 leh Union Territory pahniha district 47 a paltlang a, km 4,080-a thui a kal a ni.