President-in Udyan Utsav 2023 a hawng

President Droupadi Murmu chu nimin khan mipuite tlawh theih tura Rashtrapati Bhavan garden hawnna, Udyan Utsav 2023 chu a hawng a, naktuk aṭangin mipuiten an tlawh thei dawn a ni.

President-in mipuite tlawh tura a hawnah hian Rashtrapati Bhavan-a Mughal Gardens tih ṭhin, Inrinni liam taa Amrit Udyan tia a hming thlak tak pawh a tel. He hmun hi kumtinin mipuite tlawh theih turin hawn a ni ṭhin.

Amrit Udyan hi January 31-March 26 thleng mipuite tan hawn a ni dawn a, hemi chhung hian chawhma dar 10 aṭanga tlai dar 4 thleng tlawh theih a ni ang. March 28-32 chhung bik chu special category tan dahin, March 28-ah loneitute tan hawn a ni ang a, March 29-ah rualbanlote, March 30-ah defence, paramilitary forces leh police personnel tan hawngin, March 31-ah hmeichhia, tribal women self-help group-te tan tan bik hawn leh a ni ang.

Rashtrapati Garden hian a tirah chuan East Lawn, Central Lawn, Long Garden leh Circular Garden te a huam ṭhin. President hlui, Dr APJ Abdul Kalam leh Ram Nath Kovind-te hun lai khan huan hi siam belhin, Herbal-I, Herbal-II, Tactile Garden, Bonsai Garden leh Arogya Vanam-te a awm belh a ni.

Kuminah hian Herbal Garden, Bonsai Garden, Central Lawn, Long Garden leh Circular Garden-te chu mipuite tan thla hnih chhung hawn an ni ang. Udyan Utsav 2023 chhung hian tuilip chi dangdai tak 12-te an in par chhawk chho dawn a, hei hi tlawhtute mit latu lian tak a nih rin a ni bawk.