Police ASI-in Odisha Health Minister vawi 2 a kap

Odisha police assistant sub-inspector Gopal Das chuan nimin khan state health minister Naba Kishore Das chu Brajarajnagar, Jharsuguda district-a Gandhi Chowk bulah silaiin a awmah vawi hnih a kap. Minister hi damdawiin panpui nghalin a hnuah thlawhtheihna hmangin Bhubanewsar panpui a ni a, a kaptu police ASI pawh man nghal a ni.

Naba Kishore Das hi Gandhi Chowk-a programme hmannaah khuallian tura kal a ni a, motor aṭanga a chhuak chu minister venghim tura ruat, Gandhi Chhak police outpost-a ASI Gopal Das hian hnai tak aṭangin a lo kap a ni. Minister a kah chhan hi sawichian a la ni lo. Pawi a khawih hnu hian Gopal Das hi police dangten man nghalin, thil thleng hi chhui chian mek a ni. Pawihkhawihna thlengah hian mi dang pahnihin hliam an tuar tel bawk.

Minister hi a awmah kahfuh a ni a, a thisen pawh a chhuak nasa hle. Nikhaw hre loin a awm zui a, damdawi-in panpui a nih hnuah a dinhmun a ṭhat loh avangin thlawhtheihnain Bhubaneswar-a Apollo Hospital lamah hruai nghal a ni. Official-te chuan a ngaihtuahawm hle niin an sawi.

Odisha chief minister Naveen Patnaik chuan Apollo Hospital-ah minister hi a tlawh nghal a, pawikhawihna theng chu na taka a dem thu sawiin, minister pawh a ṭhat chhuah leh thuai a duhsak thu a sawi. Crime Branch chu pawikhawihna thlenna hmuna kal a, thil thleng hi chhui nghal tura hriattir an ni, a ti.