Mann ki Baat vawi 97-na hmang

Prime minister Narendra Modi chuan thla tina radio programme a neih ṭhin, Mann ki Baat vawi 97-na chu nimin khan a hmang. Hei hi kumina Mann ki Baat a hman hmasak ber a ni bawk.

Narendra Modi chuan ram chak ni tur chuan mipuite an tel zel a ngai tih sawiin, mitin ram tana an tih turte an thawhin ram chu a chak ṭhin a ni, a ti. Padma award dawngtu zawng zawngte chu lawmpuina hlanin, ram an dah pawimawh hmasak avangin a fak bawk.

PM hian e-waste chungchang sawi langin, fimkhur taka recycle zel an nih chuan Circular Economy of Recycle and Reuse-ah thil ṭha tak a ni thei dawn a, sawngbawl dan chi hrang hrang hmangin e-waster aṭang hian metal hlu tak tak chi 17 lakchhuah theih a ni, a ti. Wetlands humhalh a ṭulzia pawh sawiin, February 2-a World Wetlands Day hman tur chu a pawimawhzia a sawilang bawk.