Srinagar-ah Bharat Jodo Yatra kharna inkhawm neih a ni

Congress party chuan nimin khan Jammu and Kashmir-a Srinagar khawpuiah Bharat Jodo Yatra kharna inkhawm an buatsaih a, vur sur nasa tak karah mi tam tak he hun hmang tur hian an kalkhawm.

Bharat Jodo Yatra kharna atan hian Srinagar-a Congress office-ah party president Mallikarjun Kharge chuan national flag a pawtpharh a, yatra hriatrengna siam a hawng nghal bawk. He hunah hian party hruaitu Rahul Gandhi leh Priyanka Gandhi Vadra-te pawh an tel.

Party office-a hun hman zawhah, Sher-e-Kashmir stadium-ah rally neih zui niin, Jammu and Kashmir chief minister hlui pahnih, National Conference (NC) hruaitu Farood Abdullah leh People's Democratic Party (PDP) hruaitu Mehbooba Mufti-te pawhin thu an sawi a ni. He hun hmannaah hian Congress party chuan party dang 21-te sawmna a pe a, ṭhenkhat erawh chu security lam thil avangin an tel thei lo a ni.

Nikum September 7 aṭanga Kanykumari, Tamil Nadu aṭanga kal ṭan, Bharat Jodo Yatra kal tawpna hi Pathianni khan Srinagar-ah neiin, Lal Chowk area-ah Rahul Gandhi chuan India flag a pawtpharh a ni. Yatra a neih chhung hian Congress president hlui, Gandhi hian state leh UT hrang hrangah public meeting 12, corner meeting 100 chuang leh media interaction ṭum 13 a nei a, walking interaction vawi 275 leh sitting interaction vawi 100 chuang a nei hman bawk.

Yatra neih chhung hian khawvawt tak hnuaiah Rahul Gandhi hian thawmhnaw lum ha loin, t-shirt deuh hlir a ha a, hei hian mipuite ngaihven a hlawh hle. Gandhi hian Madhya Pradesh-a hmeichhe naupang pathum, khawvawt tak hnuaia thawmhnaw chhe tak inbela vawt tia an khur lai a hmuh hnuah, a kawng zawhnaah hian vawt avanga a khurh chhiat hma chuan t-shirt chauh a ha zel dawn tih thutlukna a siam thu a sawi a ni.