Sorkar laipuiin BBC documentary a khap chungchang khinna Supreme Court-in karlehah a ngaihtuah dawn

Sorkar laipuiin emergency power hmanga BBC documentary siam tihchhuah a khap chungchanga petition thehlutte chu Supreme Court chuan kar leh Thawhṭanniah a ngaihtuah dawn.

BBC hian kum 2002-a Gujarat-a intualvuakna thleng leh, he thil thlenga hetih lai Gujarat chief minister Narendra Modi a inkaihhnawih dan chungchang, India: The Modi Question documentary a siam chu BJP kaihhruai sorkar laipui chuan tihchhuah a khap a, social media platform YouTube leh Twitter-a link dahte pawh paih vek turin a lo hriattir tawh bawk.

Hetih lai hian sorkar laipui chu BBC documentary khapna atan emergency power dik lo taka hmanga puh niin, advocate ML Sharma bakah, veteran journalist N Ram, activist-lawyer Prashant Bhushan leh Trinamool Congress MP Mahua Moitra-te chuan Supreme Court-ah petition an thehlut a ni.

Chief justice of India DY Chandrachu leh justice - PS Narashima leh JB Paridwala awmna bench chuan petition thehluhte hi an ngaihtuah dawn a ni.

Advocate CU Singh chuan social media aṭanga documentary link paihna turin sorkar laipui chuan IT Rules hnuaia emergency power a hmang tih sawiin, N Ram leh advocate Prashant Bhushan-te tweet pawh lak thlak sak an ni, a ti. Block order a siam chungchang hi sorkar chuan mumal takin vantlang hriatah a tichhuak lo tih a sawi bawk.

Petition thehluttute chuan Supreme Court hnenah BBC documentary, Party I leh II te chu uluk taka zirchiang tura ngenin, kum 2002-a Gujarat-a intualvuakna rapthlak thlenga direct leh indirect-a inhnamhnawihte chungah hremna lekkawh ngei turin an phut. Sharma chuan a PIL thehlutah, sorkar laipuiin emergency power a hman dan chu ram danpui kalphung ni loa, mahse duh dana thiltihna niin a puh.