Police ASI-in a kah Odisha Minister a thi

Odisha health minister, Naba Kisore Das chu police officer pakhatin a awmah vawi hnih a kah hnuah, a hliam tuar loin Pathianni zan khan a thi.

Odisha police assistant sub-inspector Gopalkrushna Das chuan Inrinni khan Brajarajnagar, Jharsuguda district-a Gandhi Chowk bulah Health Minister hi silaiin a awmah vawi hnih a kap. Minister hi damdawiin panpui nghalin a hnuah thlawhtheihna hmangin Bhubanewsar-ah Apollo Hospital-ah hruai a ni. Mahse silai hian a lung (heart) fuhin, internal bleeding nasa tak a siam a, Pathianni zan khan a thi a ni.

Chief minister Naveen Patnaik chuan Niba Kisore Das thi chu Odisha tan channa nasa tak a ni tih sawiin, sorkar leh party tana mi hlu tak, health department lamah state mipuite hamṭhat leh chhawr tur ruahmanna ṭha tak tak hlawhtling taka a kalpui tawh thu a sawi. Chief Minister chuan Minister chunga pawikhawihna thleng chungchang hi Crime Branch chhui chian tura a tih bakah, member pasarih awmna Special Investigation Team (SIT) pawh din nghal a ni bawk.

Prime minister Narendra Modi leh president Droupadi Murmu-te pawhin Odisha minister chunga thil thleng chu pawi an tih thu leh, a chhungte an tawrhpui thu twitter-ah an tarlang.

Minister kaptu, ASI Gopalkrushna Das hi bipolar disorder nei ṭhin, psychiatrist-in a lo enkawl tawh a ni. Mental disorder a nei chung hian service revolver paitir a ni a, Minister a kahna, Brajrajnagar-a police post in-charge ah dah a ni bawk.

MKCG Medical College and Hospital, Berhampur, Psychiatry department head Dr Chandra Sekhar Tripathy chuan Das hian awlsam taka thinrim thut, mood inthlak danglam vak vak a neih ṭhin avangin kum riat vel liamta khan a clinic-ah a pan ṭan tawh tih sawiin, damdawi-te a chawh thu a sawi, a clinic-a a kal hnuhnun ber chu kum khat vel a liam tawh tih a sawi bawk. Damdawi a chawhte chu ei ṭha zel em tih a hre zui lo a, a ei ṭhat loh chuan a ṭhat lohna hi a lang leh ṭhin tih a sawi.