2023-24-a India economy ṭhanna 6.5% ni turin chhut; Vawiinah Union Budget 2023-24 pharh dawn

Parliament budget session chu nimin khan ṭan a ni a, president Droupadi Murmu-i chuan a vawi khatna turin Parliament joint sitting hmaah thu a sawi.

President Murmu chuan sorkai laipui scheme, Ayush­man Bharat leh Jan Aushadi scheme chu ram chhunga mi rethei zawkten nasa taka ṭangkaipuiin, heng hmalakna hmang hian mi vaibelchhe khat vel zet chu puih an ni, a ti. Sorkar laipui chuan mi rethei chawikan a, retheihna umbona turin theihtawp a chhuah tih a sawi bawk.

Union finance minister Nirmala Sitharaman chuan nimin vek khan Lok Sabha-ah Economic Survey (2022-23) pharhin, kum 2023-24 chhunga India economy ṭhanna chu 6.5% vel ni tura beisei a ni tih a sawi. Hei hi kum thum chhunga a hniam ber ṭum tur a ni ang. Kum 2021-22-a ram economy ṭhanna chu 8.7% niin, kum 2022-23-ah 7% a ni.

Nirmala Sitharaman-i chuan hripui vanga ram economy in nasa taka a tawrhna chu chak takin a insiamṭha leh a ni tiin, India chu khawvel ram lian zinga eco­nomy ṭhan chakna ram zingah a tel zel dawn a ni, a ti.

Economic Survey hi Ministry of Finance-a Department of Economic Affairs hnuaia Economic Division-in chief economic adviser V Anantha Nageswaran-a enpuina hnuaia a buatsaih a ni. Ram economy chungchang leh hmasawn dan tur kawngte tarlangin, sorkar laipui official report card anga ngaih a ni ṭhin.

Finance Minister hian vawiinah union budget 2023-24 a pharh dawn. Hei hi nakkum, 2024-a Lok Sabha inthlanpui neih hmaa full budget pharh hnuhnung ber tur a ni. Sitha­raman-in union budget a pharh ṭum ngana a ni bawk ang. Chawhma dar 11-ah Minister hian Parliament-ah budget hi a pharh dawn a, nikum ang bawkin paperless format-in a pharh leh dawn a ni.