AP state khawpui thar tur Visakhapatnam

Andhra Pradesh chief minister Jagan Mohan Reddy chuan Visa­kha­pat­nam chu state khawpui thar a ni dawn tih nimin khan a puang. Kum kua liam taa Andhra Pradesh aṭanga Telan­gana state hran din a nih khan, Hyderabad chu a khawpui atan a chang zui a ni.

Kum 2015 khan N Chan­drababu Naidu kaihhruai AP sorkar chuan Krishna lui kam, Vijayawada-Guntu region-a Amaravati chu state khawpui thar atan siam a ni dawn tih a puang. Kum 2020 khan sorkar chuan khawpui pathum siam turin ruahmanna a siam leh a, chungte chu - Amaravati, Visakhapatnam leh Kurnool-te an ni. Mahse he ruahmanna hi a hnuah sut lehin, Amaravati chu khawpuiah hman zui a ni.

Mahse Amaravati khawpui hi dik lo taka ram neih chungchangah sawizui leh buaina neuh neuh a awm chho a, hei hi Naidu kaihhruai sorkar thiltih dik loah CM Reddy-a party, YSRCP chuan a puh.

YSRCP chuan Ama­ravati-a ram inchuhna awm chungchang chu CBI chhuitir an phut a, mahse CM hlui Naidu chuan an sorkar laiin tih dik lo engmah an neih loh thu a sawi thung a, khawpui thar dinna tura loneitute ram leisak chu YSRCP sorkar chuan a hralh leh niin a sawi thung.

Amaravati chungchanga buaina avangin, sorkar chuan state khawpui atan coastal city, Visakhapatnam, a lamtawia 'Vizag' tih chu a thlang ta a ni. He khawpui hi Andhra Pradesh-a khawpui lian ber leh mipui bit berna a ni a, India ram east coast-ah Chennai dawta khawpui lian ber a ni bawk.