BJP thawhpui leh ai chuan thih ka thlang zawk : Nitish Kumar

Bihar chief minister leh Janata Dal United (JDU) hruaitu, Nitish Kumar chuan a lo thawhpui tawh ṭhin, BJP chu thawhpui nawn leh a tum lo tih sawiin, "BJP thawhpui leh ai chuan thih ka thlang zawk," tiin a sawi.

Kum 71 mi, Nitish Kumar chuan BJP an lo thawhpui ṭhin chu an tihsual lian tak a ni tih sawiin, Bihar-ah BJP an chak chhohna pawh an thawhdun vang mai a ni, a ti.

Kumar hian Bihar-a BJP nena thawkdun a, ṭangrual sorkar an siam aṭanga a ban hnuah, nikum August thla khan kum 2017-a an thawhdunna a lo tihtawpsan tawh, Rashtriya Janata Dal (RJD) chu thawhpui lehin, Congress party-te nen ṭangrual sorkar thar an din leh a ni.

RJD a thawhpui hnuah, BJP chuan an lama pawh let leh tumin RJD hruaitu, Tejashwi Yadav leh a pa, Lalu Prasad Yadav-te chu chhan mumal tak nei loin thubuai siamsakin an chhui zui tih Kumar chuan a sawi bawk. BJP chuan tihchhiat tumin hun remchang an zawng reng tih a sawi.

Nakkuma inthlanpui awm turah, BJP-in Bihar-a Lok Sabha seat 40 zinga 36-ah an chak dawn nia an sawi pawh chhangin, "Inthlan lo thlen hunah thu dik tak chu an hre dawn a ni. Kum 2024-ah chuan BJP duh lotu party ho an inlungrual ngei ka beisei a, Bihar-ah ṭangrual pawl, Grand Alliance-te kan inlungrual ṭhat avangin hnehin an awm dawn," a ti.

BJP Bihar unit hotu Sanjay Jaiswal chuan CM thusawi hi chhang let ve nghalin, mipuite rilrua tlahniam mek Chief Minister thawhpui tumna hi an neih loh thu leh, inbumtir an tum tawh lo tih a sawi ve bawk. Mipuite rilruah Nitish Kumar hi a tlakhniam zel avangin kum 2020 assembly inthlanah pawh JDU chu an chet ṭhat loh phah a, hetih lai hian BJP erawh an che ṭha hle thung niin a sawi. Prime minister Narendra Modi chuan inthlan hmaa thu a lo tiamte a vawng nung zel a, mahse Nitish Kumar chuan PM-in a laka rinna a neihte chu tichhiain, a phatsan ta zawk a ni, tiin a sawi.