Delhi Mayor thlan hun atan February 6 ruat leh

Delhi mayor thlan tur chu Aam Aadmi Party (AAP) leh BJP inkara buaina avangin ṭum hnih ṭhulh a ni tawh a, hemi hnu hian February 6-ah inthlan hi nei leh tura ruahman leh a ni.

Chief minister Arvind Kejriwal-a kaihhruai, AAP chuan Municipal Corporation of Delhi (MCD) inthlanna neih zawh takah, AAP chuan BJP aiin seat la hnem zawk mah se, BJP chuan mayor post hi chan ngei tuma ruahmanna siamah a puh. Deputy CM Manish Sisodia chuan BJP-in MCD-a thuneihna an chan lai khan an rorel danah Delhi mipuite an lawm lo a, hei vang hian municipal body-a rorelna chelh turin AAP chu thlan tlin a ni a, hetichung hian mayor thlan tur hi BJP chuan tihbuai an la tum chhunzawm zel a ni, a ti.

Ward 250 awmna, MCD inthlanah khan AAP hian seat 134-ah hnehna changin, kum 15 chhung BJP-in civic body-a thuneihna a lo chan tawh chu an tihtawp sak a ni. BJP hian ward 104-ah hnehna changin, Congress party chu ward pakuaah an chak ve bawk.

January 6 leh 24 khan councilor thlan tharte hi mayor thlang turin an inhmukhawm a, mahse party pahnih member-te in auhbuai nasat avangin an inthlang thei lo.

Delhi mayor post, kum nga term hi kumtina inchelh chhawk ṭhin a ni. A kum khatnaah hmeichhe puala dah niin, a kum hnihna chu open category, kum thumna reserved caterogy tan dah lehin, kum li leh kum ngana chu open caterogy bawk a ni. Kuminah hian Delhi hian hmeichhe mayor a thlan a ngai dawn a ni.