China nena inep mek karah India defence budget 13% in tipung

India leh China-te ramri chungchanga an inep mek karah, Nilainia union finance minister Nirmala Sitharaman-i'n union budget 2023-24 a pharhah khan defence budget chu kum hmasa lam aiin 13% a tihpun a ni.

Defence budget-ah hian Rs vbc nuai 5.94 dah a ni a, China ramri bula kawng siamṭhat hna chak zawka kalpui leh, jet fighter tam zawk neih belh tum a ni.

Finance Minister chuan defence budget aṭang hian capital expenditure atan Rs vbc nuai 1.63 ruahmanin, hei hi ralthuam, aircraft, indo lawng leh sipaite hmanraw mamawh dang leina atan hman a ni ang. Rs vbc nuai 2.77 chu 2023-24 chhunga sipaite hlawh tur niin, sipai penison atan Rs vbc nuai 1.38 ruahman a ni bawk.

Defence budget atana dah hi GDP aṭanga 2% vel a tling a, mahse hei hi kum 2022-a China-in defence budget atana a dah aiin a la hniam zawk tho a ni.

Budget-a tarlan danin, sorkar laipui chuan kumin chhungin navy-te lawng rual siamna turin Rs tld 242 leh air force-te mamawh leina turin Rs tld 571.4 a ruahman a ni. Indian armed forces-ah hian sipai maktaduai 1.38 awm mekin, China leh Pakistan ramriah sipai hi ṭhahnem tak dah an ni.

India leh China ramri hi km 3,500 zeta thui a ni. Kum 1962 khan ramriah sipaite hi an lo indo tawh a, kum 2020 khan Ladakh-a ramriah ram pahnih sipaite hi intibuaiin sipai eng emaw zat an thi. Hemi hnu hian sipai leh ram palai aiwhte hmangin boruak siamṭhat tumin inbiakna kalpui nghal a ni. Nikum kumtawp lam khan ramriah sipaite hi an intibuai leh a, mahse thi erawh an awm lo nia sawi a ni.