Eptute'n Adani Group chungchang chhui an phut Parliament in hnih inkhawm tihtawp a ni

Parliament budget session neih mekah, nimina Parliament in hnih inkhawmah eptu party-ten Adani Group chungchanga Hinderburg Research report tihchhuah sawiho leh chhui chian phuta an aubuai avangin rorel inkhawm tihtawp a ni.

January 31 aṭanga neih ṭan, Parliament budget session hi nimin kha full sitting day hmasa ber a ni. Mahse Congress party kaihhruaia eptuten Hinderhurg-Adani issue sawiho phuta an aubuai avangin, rorel thei loin inkhawm hi tihtawp a ni leh nghal a ni.

Rorel inkhawm tihtawp a nih hnuah joint press conference a neihah, Rajya Sabha-a leader of opposition leh Congress party president, Mallikarjun Kharge chuan Adani Group thiltih dan chu Joint Parliamentary Committee (JPC) emaw, Supreme Court enpuia Committee-in emaw an chhui chian an phut tih a sawi a, nitin report an tihchhuah an phut thu a sawi bawk.

New York short seller Hinderburg Research report-in Adani Group thiltih danah sum leh account lamah dik tawk lo a awm nia a sawi hnuah, Adani group stock hi a tlahniam nasa hle. Report tihchhuah aṭang hian USD tld 100 hu vel an hloh tawh. Hei hian an hnena investment titu, LIC, public sector bank leh financial institution-te a nghawng nasa dawn hle a ni. Mahse Adani group chuan an puhna hi thu dik lo niin a sawi a, Hinderburg Research report pawh hi thu dik lo leh rin tlak lo niin a sawi thung.

India rama life insurer lian ber, LIC hi Adani Enterprises Ltd (AEL)-ah anchor investor niin, Rs vbc 300 vel a invest a ni.