Ayodhya-a Ram lim siamna tur lung Nepal aṭangin lalut

Uttar Pradesh-a Ayodhya hmuna Ram Temple sak meka hman tur lung thianghlim, holy stone pahnih chu Nepal aṭangin lakluh a ni.

Heng lung thianghlim, Shaligram stone pahnihte hi Nilaini zan khan Hindu pathian, Ram pianna hmunah puithiam leh tualchhung miten lo dawngsawngin, lung hi parṭhi awrh tirin Shir Ram Janmabhoomi Teerth Kshetra Trust hnenah an hlan a ni.

Nepal aṭanga lung lakluhte hi Ram leh Janaki lim siamna atan hman a ni dawn nia sawi a ni a, heng limte hi Ram Mandir sak mekna main temple-ah dah an ni ang.

Shaligram stone hi Nepal rama Myagdi leh Mustang district luang tlang, Kali Gandaki lui kamah chauh hmuh an ni. Nepal-a Sita pianna hmun, Janakpur aṭangin motor lian pahnih hmangin Ayodhya-ah hian phurh an ni. Lung hi ton 26 leh ton 14-a rit an ni a, mi lim siamna atana hman tlak a ni tih technical leh scientific hmanga finfiah an ni tawh tih Nepal official-te chuan an sawi. Shri Ram Janmabhoomi Teerth Kshetra Trust office-in-charge Prakash Gupta chuan Shaligram lung pahnih hi kum maktaduai 60 vela upa an ni tawh a ni, a ti.