BBC documentary tihchhuah khap chungchangah SC-in sorkar laipui hnenah hriattirna a pe

BBC-in kum 2002-a Gujarat intualvuakna thleng leh, prime minister Narendra Modi nena inkaihhnawihna a neih dan documentary a siam, sorkar laipuiin a khap chungchanga Supreme Court-a petition eng emaw zat a luh hnuah, court chuan nimin khan sorkar laipui chu insawifiah turin hriattirna a pe.

Supreme Court-a chief justice of India DY Chandrachud kaihhruai bench chuan nimin khan petition pahnih ngaihtuahin, sorkar laipui hnenah public domain aṭanga documentary link la thla tura thupek a tihchhuahna original chu sorkar laipui hi a dil a ni.

Petition thehlutah hian, documenatary tihchhuah khap leh social media aṭanga link paih tura a tih chungchangah, sorkar laipui chuan dik lo takin emergency power a hmang niin an sawi. Petition thehluttu zinga mi, lawyer ML Sharma chuan sorkar laipui hian blocking order hi dan dik takin mipui hmuh tur pawhin a tilang lo niin a sawi bawk. Sharma chuan BBC documentary hi mipuite en theih tura tlangzarh a nih laiin, sorkar laipui chuan thudik tak thehdarh a ni tur chu hlauin India ram mipuite en a khap ta a ni, a ti.

January 21 khan sorkar laipui chuan Information Technology Rules, 2021 hnuaia emergency power hmangin, BBC documentary 'India : The Modi Question' hi tihchhuah a khap a, YouTube leh Twitter-a link dahte pawh la thla vek turin a ti a ni. BJP kaihhruai sorkar laipuiin khapna a siam hnuah, eptu leh zirlai pawl ṭhenkhat chuan he documentary hi an mipuite en theih turin a chhuah lui tho a ni. College campus ṭhenkhatah chuan buaina chhuah phahin, zirlai ṭhenkhat man an ni.