Adani issue : Feb 6-ah Congress party-in nawrh huaihawt dawn

Parliament session neih mekah, nimin khan eptu party-te chuan Adani Group chungchang sawiho phutin an aubuai leh a, hei vang hian Rajya Sabha leh Lok Sabha-ah rorel inkhawm tihtawp lailawk a ni leh.

New York short seller Hinderburg Research report chuan Adani Group thiltih danah sum leh account lamah thil dik tawk lo a awm niin a tarlang a, hei hian Adani Group hnuaia company-a investment titute a nghawng tel dawn a ni. He report leh, Adani Group chungchang hi eptute chuan Parliament-ah sawiho an phut a ni.

Congress party chuan sorkar laipuiin LIC, SBI leh nationalised bank-te Adani Group company-ah investment a tihluih tir nia sawiin, he buaina hi a nghawng dan tur chungchanga an zawhnate chu BJP sorkar leh prime minister Narendra Modi-te chuan an chhang duh lo tih an sawi. Hei vang hian February 6 hian ram chhunga district tina LIC leh SBI office kawtah an party unit-te chu nawrh huaihawt turin a ti.

Hinderburg Research report hi chief justice of India enpuina hnuaiah emaw, Joint Parliamentary Committee (JPC) emawin an chhui an phut tih Congress hruaitu KC Venugopal chuan a sawi a; LIC, SBI leh nationalised bank-te investment tihtir an nih dan chu Parliament-ah sawiho an phut bakah, investor-te tana hma la tura sorkar laipui an phut thu a sawi bawk.

LIC chuan January 30 thlenga Adani Group-ah sum a invest chu Rs vbc 36,474,78 a nih thu sawiin, SBI hian sum tam tham tak a puktir bawk. Adani Group buaina hian mipui tam tak a nghawng tel dawn avangin, chhui chian thuai a, nitin report pawh pe zel turin an phut thu Congress president Mallikarjun Kharge chuan a lo sawi tawh bawk a ni.