TN-a eye drop siamtu an thil siam titawp turin hriattir

US-a Food and Drugs Administration (FDA) in an rama mi pakhat thihna thlenna leh, mi dang eng emaw zatin an mit (eye) lama harsatna an tawh chungchanga inzawmna neia puh, Tamil Nadu-a eye drop siamtu, pharmaceuticals company Global Pharma Healthcare chuan an damdawi siam hi titawp rih tura hriattir a ni.

Drugs regulator, Central Drugs Standard Control Organisation (CDSCO) chuan Tamil Nadu Drug Controller-te nen kar liam ta Zirtawpni khan Chennai-a Global Pharma Healthcare company hi tlawhin, an enfiah a ni. Hemi hnu, Inrinni khan company hnenah an thil chhui an zawh fel hma chu eye drop hi siam chhunzawm tawh rih lo turin a hriattir.

US Centers for Disease Control and Prevention (CDC) chuan kar liam ta khan an rama health alert tichhuakin, mipuite chu Global Pharma Healthcare Pvt Ltd siam EzriCare Artificial Tears chu lei leh hmang lo turin a ti. He eye drop hmangtu mi eng emaw zat chuan an mit lamah infection thlenin, an khawhmuh (vision) thlengin a tichhia nia sawi a ni. He damdawi hi India ram chhungah erawh zawrhchhuah a ni lo thung.

He thil thlen hnu hian Tamil Nadu drug controller, Dr PV Vijayalakshmi chuan an siamna sample leh document-te chu US-ah thawn anih thu a sawi a, hei bakah hian ram chhunga lab pahniha enfiah turin raw material sample pawh pek a ni tih a sawi bawk. Hemi rual hian eye drop siamtu pharma company hi license nei leh, ram pawna a damdawi siam a thawnchhuahnaah pawh dan dik taka ti a nih thu a sawi.