Scientist leh academic 500 chuangin BBC documentary khapna an sawisel
BJP kaihhruai sorkar laipuiin BBC documentary siam, 'India:The Modi Question' tihchhuah a khap chuan sawi a la hlawh zui zel. Indian scientist leh academic 500 chuang chuan open statement siamin, documentary khap a ni chu an sawisel.
Thuchhuah an siamah, sorkarin BBC documentary a khap chu India mite dikna chanvo, sorkar leh society chungchanga thil pawmawh an hmuh leh sawiho theihna palzut sakna niin an sawi. India sorkarin social media aṭanga documentary a lak thlakna chhan, India ram thuneihna leh inpumkhatna ngaih pawimawhsak loh tia a insawifiahna chu pawm tlakah an ngai lo tih
an sawi.
Ram chhunga university thuneituten documentary en tum zirlaite an dan leh khapbeh chungchang pawh sawilangin, hei hi 'academic freedom' palzutna lian tak a ni, an ti bawk. Sorkar sawiselna lam a nih avanga university-ten a en duhte an lo khap ve ngawt chu thil pawm theih a ni lo, an ti.
Kum 2002-a Gujarat intualvuakna rapthlak thleng leh, he thil thlen hunlaia Gujarat chief minister Narendra Modi inkaihhnawih dan tarlanna, BBC documentary khap a nih chungchangah eptu party hrang hrangte chuan BJP sorkar an sawisel a, Supreme Court-ah pawh sorkarin khapna thupek a tihchhuah khin letna petition eng emaw zat a lut a ni. Documentary tihchhuah khapna atana sorkar laipuiin Information Technology Rules, 2021 hnuaia emergency power a hman chu ram danpui kalh niin an sawi bawk.
Gujarat-a intualvuakna thleng chungchangah hian Supreme Court ruat, investigation team chuan hetih laia CM, tuna prime minister Narendra Modi tihsual leh inhnamhnawihna engmah a awm lo niin a lo sawi tawh a ni.