Supreme Court judge thar 5-te lalut dawn

Supreme Court judge atana ruat thar mi panga te chu vawiin hian lakluh an ni dawn.

Collegium-in Supreme Court judge tura a rawtte hming a thehluh aṭanga thla hnih dawn hnu, Inrinni khan president Droupadi Murmu chuan a rawtna hi a pawmsak ta a ni. Mi panga lakluh turte nen hian judge 34 awm theihna tur, Supreme Court-ah hian chief justice of India telin judge hi 32 an awm dawn ta a ni.

Supreme Court judge atana ruatte chu - justice Pankaj Mithal (Rajasthan High Court chief justice), justice Sabjay Karol (Patna High Court chief justice), justice PV Sanjay Kumar (Manipur High Court chief justice), justice Ahsanuddin Amanullah (Patna High Court judge) leh justice Manoj Misra (Allahabad High Court judge) te an ni. Vawiin chawhma dar 10.30-ah Supreme Court addition building complex-ah chief justice of India DY Chandrachud chuan rinawmna thu tiamtirin a lalut ang.

President Murmu sawmna angin nimin khan Chief Justice of India DY Chandrachud leh Supreme Court judge-te chuan Rashtrapati Bhavan-a Amrit Udyan an tlawh a ni.