Vote thlak dan tihdanglam vangin Delhi Mayor thlang thei lo leh

Delhi Mayor thlanna turah vote thlak theite tihdanglam a nih avangin nimina meeting chu inthlang thei loin an titawp leh.

Nimin kha Delhi Mayor thar thlan an tum ṭum thumna a ni. January 6 leh January 24 khan Mayor thlan an lo tum tawh bawk a, mahse BJP leh AAP member-te inauhbuai vangin inthlang thei loin an lo awm tawh a ni.

Inthlan neih turah hian lieutenant governor VK Saxena-a'n councillor atana a ruat, nominated councillor 10-te chu vote thlak phalsak an nih avangin Aam Aadmi Party (AAP) lam an lungawi lo a, an inthlang thei leh ta lo a ni. Delhi Municipal Corporatoin Act hnuaiah nominated member-te hi inthlanah vote an thlak ve phalsak an ni lo.

AAP chuan Lt Governor thiltih dan chu BJP duhsak tumna a ni tih sawiin, an pawm thei lo tih an sawi.

Nikum December-a Municipal Corporation of Delhi (MCD) inthlanah khan AAP hian kum 15 chhung thuneihna lo chelh tawh, BJP chu an hneh a ni. AAP hi ward 250 zinga ward 134-ah an chak a, BJP hi ward 104-ah an chak. Mayor leh deputy mayor hi secret ballot hmanga thlan tur an ni.

AAP chuan a hmain state sorkar rawn loa Lt Governor-in councillor atan mi 10 a ruatte chu a lo sawisel tawh a, hei bakah Lt Governor vekin presiding officer atana Satya Sharma a ruat chu duh loin, house-a councillor senior ber Mukesh Goyal chu presiding officer-a dah an phut a ni.

Thla khat chhunga Mayor thla tumna ṭum thum zet a hlawhchham avangin AAP chuan Supreme Court-ah thlen an tum. AP hruaitu Atishi chuan ni 10 chhunga court enpuina hnuaiah inthlan hi buatsaih nih theihnan Supreme Court-ah an thlen dawn tih a sawi a, "Inthlan buatsaih a, Delhi-in mayor a neih thuai hi kan duh a ni," a ti.