Adani group chhui chian phutin eptu party-ten nawrh huaihawt

Eptu party 16 hruaitute chuan nimin khan Parliament compound-ah Adani group chungchang chu Joint Parliamentary Committee chhui chian tir phutin nawrh an huaihawt.

Nawrh huaihawt hma hian eptu pawlte hian Rajya Sabha-a Leader of Opposition Mallikarjun Kharge chamber-ah meeting an nei hmasa a, hemi hnu hian lungawi lohna lantir zui a ni. Meeting-ah hian Congress, DMK, NCP, BRS, JDU, SP, CPM, CPI, JMM, RLD, RSP, AAP, IUML, RJD leh Shiv Sena party-te an tel. Trinamool Congress chu meeting-ah hian tel lo mah se, Parliament complex-a Mahatma Gandhi lim bula nawrh huaihawtnaah erawh an tel.

Eptu MP-te chuan Adani scam issue chu JCP emaw, Supreme Court enpuina hnuaiah emaw chhui chian an phut thu an sawi. House-ah pawh thil dang sawi loa, hemi chungchang sawiho an phut dawn tih an sawi bawk.

US-a short seller firm, Hinderburg Research report-in Adani group thil tih dan dik tawk lo nia sawi - stock an tihchingpen dan, tax hman dan dik tawk lo, dan dik loa sum an transfer dan leh, leiba tam tak an neih dan chungchangte a puanzar hnuah, Adani Group sum dinhmun hi a tlahniam nasa tawh hle. Ni 10 chhungin USD tld 100 chuang hu zet an hloh tawh a ni. Hetih lai hian Adani Group chuan dan ang taka thil an tih thu an sawi ve thung.

Adani Group-ah hian LIC, SBI, public sector bank leh financial institution dangten investment an tih avangin India mi tam tak a nghawng tel dawn a, hei vang hian eptute chuan hemi chungchang hi sawiho an phut a ni.