AAP-in BJP office kawtah lungawi lohna lantir

Delhi Mayor thlan tumna ṭum thum zet a hlawhchham tak avangin, Aam Aadmi Party (AAP) chuan nimin khan Delhi-a Rouse Avenue road-a BJP headquarters kawtah lungawi lohna an lantir.

AAP hruaitu leh worker kalkhawmte chuan BJP chet dana an lungawi lohna thuziakte an keng a ni.

Thawhṭannia Mayor thlan turah, Delhi Municipal Corporatoin Act kalha Delhi lieutenant governor, VK Saxena-a'n councillor atana a ruat, nominated councillor 10-te vote thlak tir tum an nih avangin AAP an lungawi lo a, BJP member-te nena inau buai lehin inthlan hi an ṭhulh leh a ni.

Delhi Municipal Corporation (DMC) Act, 1957 hnuaiah mayor leh deputy mayor-te hi civil poll neih zawha session hmasa berah thlan tur tih a ni. Mahse municipal inthlan an neih aṭanga thla hnih a ral hnuah pawh mayor hi an la thlang thei lo. AAP chuan mayor thlanna neih tur a hlawhchham tawh avangin, Supreme Court-ah thlen a, court enpuina hnuaia inthlan neih tir turin an ngen dawn tih an sawi.

AAP leh BJP hi mayor thlan theih loh chhanah an inpuh tawn. January 4-a Munipical House session hmasa berah khan nominated councillor-te lakluh chungchangah BJP leh AAP member-te hi an inaubuai nghal a, mayor thlan hmain inkhawm hi tihtawp a ngai a ni. Session ṭum hnihna, Janaury 24-a neihah khan vote thlak tura inbuatsaih lai mekin, AAP councillor Mukesh Goyal chuan nominated member-ten mayor an thlan ve theih loh thu sawiin House aṭanga chhuahtir turin a phut a, hei hi BJP councillor-te chuan lo sawiselin, rorel chhunzawm thei loin inkhawm tihtawp a ni. A vawi thumna, Thawhṭannia session neihah pawh, nominted member-te vote thlak phalsak an nih chungchangah AAP member-te lungawi loin rorel inkhawm tihtawp a ni leh a ni. AAP chuan Municipal Act kalha sorkar laipui aiawh, Lt Governor-in councillor atana a ruatte vote thlak tir chu BJP duhsakna lantir tumna a ni, an ti.