UP-a 'cow sanctuary' siamna turin sorkarin laipuiin Rs vbc 63 ruahman

Sorkar laipui chuan cow sanctuary a siamna tur pilot project chu Uttar Pradesh-ah a kalpui dawn a, hemi atan hian cheng vaibelchhe 63 a ruahman. He project hi national dairy development board-in a buaipui ang.

UP hi stray cow tamna hmun a ni a, heng bawngte hian thlai chinte an tihchhiat nasat bakah, mihringte thlengin an bei fo a, kawngpuia motor tlante tan harsatnate an thlen fo ṭhin bawk. Hei vang hian an state hi cow sanctuary siamna atan pawh thlan hmasak a ni. Muzaffarnagar district-a Purkazi khuaa ram hectare 52-a zau chu state sorkarin sanctuary siamna atan hian a pe a ni.

National dairy development board chuan sanctuary siamna tur tender hi a tichhuak thuai dawn a, sanctuary hi enkawltu nei lo bawng 5,000 awm theihna tura hman a ni. Thla li chhunga zawhfel hman tum a ni.

Sanctuary-a bawng dahte enkawlna atan state sorkar chuan bawng pakhatah ni khatah Rs 30 zel a pe ang. Heng sensote hi Muzzarfarnagar-a panchayat 500 ten an tum ṭhen ang a, a bak chu industry leh civil society-te donation aṭangin pek a ni ang. Sanctuary enkawltu tur committee pawh siam a ni dawn a, district office-te an nei ang. He sanctuary hi research tihna atan pawh a ṭangkai thei dawn tih an sawi.

UP-a BJP sorkar chuan state chhungah hian bawng enkawlna hmun 6,222 an siam tawh thu leh, heng hmunah hian enkawltu nei lo bawng nuai 8.55 vel an awm thu a sawi. Hetichung hian enkawltu awm lo bawng hi an la tam hle a, hei vang hian sanctuary siam chu hmalakna pawimawh tak, national policy-a siam ngai a ni tiin, UP MP leh union minister of state for Fisheries, Animal Husbandry and Dairying, Sanjeev Balyan chuan a sawi.