2017-2022 chhungin zirna sang zawk zir turin Ram dangah India mi nuai 30 chuang an kal

Ministry of education chuan kum 2017-2022 chhungin India ram aṭangin zirlai nuai 30 chuang, zirna sang zawk bei turin ram dangah an kal chhuak tih a sawi.

Lok Sabha inkhawmah junior education minister Subhas Sarkar-a'n JD(U) MP Rajiv Ranjan Singh zawhna, ziaka a chhannaah hei hi a tarlang a ni. Minister chuan ministry of home affairs-a bureau of immigration chuan India mi lut leh chhuakte data hi a buaipui thu a sawi a, mahse ram danga zirna sang zawk bei tur an ni tih tarlanna tur category erawh a awm hran loh thu a sawi. An kal chhan hi ṭawngkama an sawi leh, an visa a zirin a hriat theih chauh a ni, a ti.

Sarkar chuan nikum chhung khan mi nuai 7.50-te chuan ram danga an kalna chhan chu zirna vang a ni tih an sawilang tih a sawi a, kum 2021-ah mi nuai 4.4 awmin, 2020-ah nuai 2.59, 2019-ah nuai 5.86, 2018-ah nuai 5.17 leh 2017-ah mi nuai 4.54 an awm bawk.

Zawhna zawttu, JDU MP chuan ram danga lehkha zir tura zirlai tam tak kalte sum senral chu India rama education budget aiin a sang zawk nia sawi chu a dik em tih Minister hi a zawt a, hei bakah sorkar laipui chuan international university din tumna a nei em tih a zawt bawk a ni. A zawhna hnuhnung zawk hi minister chuan chhangin, international university din tumna hi a awm rih lo a, mahse university grants commission (UGC) chuan foreign higher educational institution-in India rama campus an din theihna tur dan a duang mek a ni, tiin a sawi.