Parliament Affairs Minister-in Rahul Gandhi laka action lak phût

Parliamentary affairs minister Pralhad Joshi chuan Congress hruaitu, Rahul Gandhi chu Lok Sabha-a a thusawi dan chungchangah a laka action lak a phut a, a thusawite pawh record aṭanga paih a phût bawk.

Thawhlehnia Lok Sabha inkhawma Rahul Gandhi thusawi ṭhenkhat chu record aṭangin paih a ni tawh a ni.

Nimina rorel inkhawm ṭan a nih veleh, union minister Joshi chuan Rahul Gandhi chungchang hi rawn sawi chhuak nghalin, Parliament rules hnuaiah mi tupawhin midang a puhna chungchang a sawi dawn a nih chuan, notice a pe hmasa tur a ni, a ti. "Congress hruaitu hian midang a puhna hi a rawn sawichhuak a, mahse chungte chu rintlak lo leh belhchian dawl lo a ni. A thusawi hi paihin, a lakah pawh action lak a ni ngei tur a ni," a ti. Gandhi thusawi avang hian a laka privilege motion putluh a a nih tur thu pawh a sawi bawk.

Speaker chuan Minister thusawi chungchangah thutlukna engmah a siam nghal lo a, zirchian hnuah thutlukna a siam dawn tih a sawi.

Thawhlehnia Lok Sabha inkhawmah khan Rahul Gandhi chuan Hindenburg report chungchangah sorkar laipui chu na takin a bei. Kum 2014-a central-a BJP a sorkar aṭangin Gautam Adani hausakna chu nasa takin a rawn pung chho a, khawvela mi hausa list-ah pawh 69-na aṭangin pahnihnaah a rawn kai chho mai thei a ni, a ti.

Gandhi thusawi hi BJP lam chuan an helh nghal hle a, union law minister Kiren Rijiju chu a rinthua midang puh ringawt lo tur leh, an puhna finfiahna tilang turin a phut. Rorel inkhawm zawh hnuah pawh Parliament pawn lamah BJP hruaitu Ravi Shankar Prasad chuan Gandhi hi a bei zui bawk a, thu belhchian dawl lo leh awmze nei lo sawiah puhin, Gandhi chhungkua chu thil dik tawk lo tihnaah inhnamhnawih nasa leh, ram hmel tichhetu an ni zawk tiin a sawi zui.

Hindenburg Research report-in Adani Group chungchang a sawina chu eptute chuan chhui chian an phut thu a lo sawi fo tawh. Report tihchhuah hnua Adani Group dinhmun nasa taka a tlakhniam zel vangin, an group-a investment titu India ram mipui tam tak a nghawng dawn avangin ngaihven thuai a ṭul niin an sawi. Hindenburg report hian India ram economy thlengin a nghawng a ni, an ti.

Dravida Munnetra Kazhagam (DMK) MP Kanimozhi chuan Hindenburg Reserch hian ram hrang hranga institution 15-te chungchang a zirchianna report a tichhuak a, hei hi ram dangte chuan an ram beihna angin tumahin an sawi ve lo, a ti. Hetih lai hian India ramah chuan Adani chungchang sawichhuah a nih hlekin, rorellai BJP-te chuan nasa takin lungawi lohna a lantir zui nghal zel a ni tiin, prime minister Narendra Modi kaihhruai sorkar laipui chu sumdawng liante hum tumah a puh.