Congress President-in a thusawi record aṭanga paih a nih chhan zawt

Congress party president Mallikarjun Kharge chuan nimin khan Rajya Sabha chairperson, vice president Jagdeep Dhankar hnenah prime minister Narendra Modi thusawi chungchang a sawina, Parliament record aṭanga paih ṭhen a nih chhan a zawt. Parliament record aṭang hian Kharge bakah, Congress hruaitu Rahul Gandhi thusawi ṭhenkhat pawh paih a ni bawk.

Mallikarjun Kharge chuan, "Ka thusawiah Parliament dan kalh zawng emaw, midang tu emaw puh chhiatna tur lam a awm ka hre lo. Ṭawngkam ṭhenkhat chu a mawi lo deuh pawh a ni thei.; nimahsela paihchhuah tur khawp a nih chuan a awmzia min zawt hmasa thei reng a ni. Prime minister hlui, Atal Bihari Vajpayee pawh khan PM hlui vek Narasimha Rao chungchangah ṭawngkam na tak a hmang a, mahse a thusawite chu lehkhabua dah tel reng a la ni," a ti.

Rahul Gandhi pawhin a hma niin record aṭanga a thusawi ṭhenkhat paih a nih chungchang chu sawichhuakin, "Prime minister chu billionaire Gautam Adani nena an inlaichinna chungchang ka zawt ringawt a ni. Min chhang bawk lo a, thu dik tak chu a langchhuak mai a ni. Ṭhianṭha tak an nih loh chuan Adani group chhui chian chu a remti ve mai tur a ni," tiin a sawi.

Adani Group-te thil tih dan dik tawk lo puanzar a nih hnuah, Congress party leh eptu party dangte chuan PM Modi kaihhruai, BJP sorkar chu na takin an bei zui reng a ni. Adani group chungchang chhui chian an phut.

SC-in Adani firm chungchanga PIL thehluh ngaihtuah dawn

Supreme Court chuan Adani Group chungchanga Hindenburg Research report tihchhuah, chhui zui tura ngenna petition thehluh chu vawiin hian a ngaihtuah dawn.

Hindenburg report tih-chhuah a nih hnuah eptute chuan Adani Group dinhmun chu chhui chian an phut.

Supreme Court-ah hian advocate Vishal Tiwari chuan petition thehlutin, Hindenburg Research report chungchang chhui chiang tur committee din tura sorkar laipui hriattir turin Court a ngen.

Tiwari chuan a petition thehluh chu chief justice DY Chandrachud kaihhruai bench hnenah urgent listing-a dah turin a ngen a, vawiin hian an ngaihtuah dawn a ni.