China aṭanga lutte tan Covid test neih hmasak ngai tawh dawn lo

Ram chhungah leh khawvel huapa Covid-19 hri leng a ziaawm tak zel avangin, sorkar laipui pawhin khualzinte tana khuahkhirhna a la siamte a

hlip dawn.

Union health ministry chuan karleh Thawhṭanni aṭangin China, Singapore, Hong Kong, Korea, Thailand leh Japan ram aṭanga khualzin lutte chu India ram luh hmaa Covid-19 test neih phawt a phut ṭhin chu tihtawp a ni tawh dawn tih a sawi. Heng ram parukah hian kar li chhung hri leng hi a tlakhniam tawh avangin dante hi ennawn a ni tih a sawi bawk.

Health ministry secretary Rajesh Bhushan chuan, World Health Organisation-in Covid-19 chungchanga khawvel pum huap dinhmun a tihchhuahah, ni 28 chhung chu a hma ni 28 aiin hri kai thar hi 89% in an tlahniam tawh a ni, a ti. India ram boruak pawh a ṭha chho zel a, ram pum huapa ni khata hri kai thar hi 100 leh 100 aia tlemte an ni tawh a ni, tiin a sawi.

Hri kai thar mi 114 an awm

Union health ministry-in a tarlan danin, Ningani khan ram pumah Covid-19 hri kai thar mi 114 an awm a, hripui vanga thi mi pahnih an awm bawk.

Daily positivity rate hi 0.08% niin, weekly positivity rate pawh 0.08% a ni bawk.

Hri kai hmuchhuah tawh hi nimin zing dar 8 thleng khan mi 4,46,83,862 an awm tawh a, an zinga 5,30,750-in an thihpui tawh a ni. Covid-19 thihpui, fatality rate hi 1.19% a ni.

Ram pumah hri kai mek, active case hi 2,797 awmin, hei hi hri kai tawh aṭangin 0.01% a ni. Hri kai enkawl dam, recoverty rate hi 98.81% a ni mek bawk.

Ministry-in a tarlan danin, nimin zing thleng khan Covid-19 vaccine hi dose vaibelchhe 220.62 sem chhuah a ni tawh a ni.