Rajya Sabha aṭangin Congress leh eptu MP dangte chhuak tau

Rajya Sabha-a leader of opposition, Congress party president Mallikarjun Kharge thusawi phalsak a nih loh avangin nimin khan Congress leh eptu MP dangte chu House aṭangin an chhuak tau.

Mallikarjun Kharge hian Parliament record aṭanga a thusawi ṭhenkhat paih a nih chungchang sawi a tum a, mahse a thusawite hi paih an nih tawh avangin a sawi chhuah nawn leh phalsak a ni lo a ni. Hei hi duh loin, eptu member-te chuan Leader of Opposition hi an thlawpna an lantir a, mahse House chairperson chuan an ngenna hi a pawmsak duh lo.

Rajya Sabha chairman, vice president Jagdeep Dhankhar chuan Kharge chu a hma in thu sawi phalsak a ni tawh a, a thusawi ngai bawk chu sawi nawn phalsak a ni tawh lo tih a sawi. Hemi hnu hian eptu MP-te hi lungawi loin House aṭangin an chhuak a ni.

PM-in eptute zawhna a chhang lo : Congress President

Congress president Mallikarjun Kharge chuan Parliament in hniha prime minister Narendra Modi thusawi chu thusawi tluanglam pangngai niin, eptute zawhna leh an thil hriat duh pawimawhte engmah a sawi lang lo, a ti.

Kharge chuan PM thusawi chu nidanga thusawi dan pangngai ang mai a ni a, sorkar lam chuan eptuten ram chhunga thil man sang zel te, unemployment rate sang zel leh, Adani Group chungchanga zawhna pawimawh tak tak an neihte chu a ngaihsak duh lo tih a sawi.

"India pawisa hlutna a tlahniam zel a, ram chhunga primary school 71,000 te khar an nih laiin private education institution erawh an pung zel a, mahse heng chungchanga zawhna awmte chu PM hian a chhang miah lo a ni," tiin a sawi.

Parliament budget session neih mekah, Rajya Sabha leh Lok Sabha-ah eptute chuan Adani Group chungchang, Hindenburg Research report-in a tarlan chu sawiho leh, Adani Group chhui chian an phutin rorellai BJP lam nen rorel mumal thei loin an in aubuai fo a, rorel inkhawm pawh tihtawp a ngaih phah fo bawk.