March 13 thleng Rajya Sabha inkhawm titawp

Rajya Sabha inkhawm chu eptu member-ten Congress MP Rajani Patil hremna sut tur leh, Adani Group thil tihdan dik tawk lo nia sawi chu Joint Parliamentary Committee (JPC) chhuitir phuta an auhbuai chhunzawm zel avangin March 13 thleng atan tihtawp rih a ni.

Nimin House rorel inkhawm ṭan a nih hnu reiloteah inkhawm hi titawpin, chawlh lailawk neih hnuah March 13, chawhma dar 11-ah neih chhunzawm a ni ang.

House chairman Jagdeep Dhankar chuan leader of opposition, Congress president Mallikarjun Kharge chu thusawi a phalsak a, mahse rorellai MP lamin an lo aubuai a, hemi hnu hian eptu lam MP-te chu lungawi loin House laiah an chhuak khawma, a aubuai zui ve leh bawk. Rorel thei loa member-te an inauhbuai leh tak vangin inkhawm hi tihtawp a ni.

Congress MP Patil hi House-a rorellai video, phalna nei loa a lo thehdarh avangin budget session chhung atana rorelnaa tel thei loa hrem a ni.

Tun ṭum session-ah hian House pahnihah eptute chuan Adani Group chungchanga Hindenburg research report tihchhuah chhui chian phutin sorkar lam an nawr nasa hle. Rorel mumal thei loin inkhawm pawh tihtawp a ngaih phah fo bawk.

Dhankar chuan mipuite aiawhte rorel thei loa an awm fo chu hrehawm a tih thu leh, zanah pawh a mut ṭhat loh phah hle tih sawiin, "Khawvelin mi thlir reng a ni. Member-te hi hetianga an che ṭhin leh, Constitution thlenga an bei ṭhin hi ka lo ngaihtuah phak bak a ni," a ti. Mipuiten hetianga awm tur hian an beisei lo tih a sawi.