SC-in J&K Delimitation Commission laka petition thehluh a hnawl

Supreme Court chuan Jammu and Kashmir-a assembly leh parliamentary constituency huam chin siamṭha tu, Delimitation Commission laka petition thehluh chu a hnawlsak.

Kum 2019 khan sorkar laipui chuan Jammu and Kashmir special status pekna, Article 370 titawpin state a nihna a ṭhiat a, union territory pahnih - Jammu and Kashmir leh Ladakh-ah a ṭhen a ni. Hemi hnu hian assembly leh parliamentary constituency huam chin hi siam ṭha turin delimitaton commission hi din a ni.

Panel hian nikum May thla khan constituency-te huam chin ennawn a siamṭhat a ni. Jammu and Kahsmir assembly-ah hian seat 114 awmin, seat 24 chu Pakistan occupied Kashmir (PoK) tan dah a ni a, inthlan chu seat 90 (Jammu region-ah seat 43 leh Kashmir Valley-ah seat 47) ah neih tur a ni. Hei bakah hian PoJK (Pak-Occupied Jammu and Kashmir) refugee leh Kashmiri migrant-te chu assembly-ah nominated member-a dah tel an rawt bawk.

Commission-in constituency a siamṭhat hi eptu lam chuan sawiselin, BJP tana ṭha tur zawnga duangah an puh. Haji Abdul Gani Khan leh Muhammad Ayub Matto-te chuan Supreme Court-ah petition thehlutin, kum 2026 hma chu ram chhung khawi hmunah pawh constituency redrawing leh delimination khap avangin, commission thutlukna hi a pawm tlak lo niin a sawi. Petition-ah hian 1971 census-a constituency-te dinhmun chu 2026 hnua census neih leh hmasak ber hma chu thlak danglam a ni tur a ni lo tih a nih thu an sawi. Mahse nimin khan Supreme Court chuan petition hi ngaihtuahin, a hnawlsak ta a ni.