India ramah a zawnin ni nga chhung hri kai hmuh thar 50,000 a chuang ziah

India ramah ni nga chhung chu coronavirus kai  hmuh thar 50,000 chuang an awm ziah. Pathianniah hri kai hmuh chhuah thar mi 52,972 awm lehin, hri kai hmuh tawh hi mi 18,03,695 an tling tawh a ni. Union health ministry  data-in a tarlan danin, hri kai zinga 11,86,203 chu enkawl dam an ni tawh a, mi  38,135 in an thihpui tawh thung. Hri kai mek hi mi 5,79,357 an la awm. Recovery rate hi 65.44%  niin, hripui thihpui zat hi 2.13%  a ni thung. 

August 2 thleng khan sample 2,02,02,858 test a ni tawh a, Pathianni bikah khan sample  3,81,027 test hman a ni tih  Indian Council of Medical Research (ICMR)  chuan a tarlang. ICMR chuan laboratory leh hospital hrang hranga rapid antigen test hmanga test neih sak, symptom nei si, an result negative-te chu RT-PCR hmanga test nawn leh vek turin a ti. 

Uttar Pradesh-a technical education minister Kamal Rani Varun, kum 62 mi chu Covid-19 vangin Pathianni khan a thi. Minister hi July 18 khan coronavirus a kai tih hriat a ni a, damdawiinah dah  nghal a ni. Diabetes mellitus, hypertension, leh hypothyroidism natna nei sa a ni a, damdawiina dah a nih hian pneumonia a nei tel bawk. 

ICU-ah dah nghal niin ṭhat lam a pan thei lo a, Pathianni chawhma dar 9:30 khan Sanjay Gandhi Postgraduate Institute of Medical Sciences-ah a thi tih state sorkar thuchhuah chuan a tarlang. Kamal Rani Varun hi Kanpur-a Ghatampur bial MLA a ni a, a hmain Lok Sabha member pawh ṭum hnih a lo ni tawh bawk. 

Karnataka chief miniser BS Yediyurappa chuan Covid-19 a kai tih Pathianni zan khan a sawi a, a fanu pawhin hri hi a kai ve bawk. Kum 77 mi, CM Yediyurappa chuan a ngaihtuahawm lo a, mahse doctor-te thurawn angin damdawiina a lut tih a sawi. Hri kai avang hian tun hnaia amah lo hnaihte chu inkung hrang a, an sample endik tir turin a ngen nghal bawk. CM bakah hian a personal secretary leh a staff zinga panga chuan hri an kai tih hriat a ni bawk a ni.