MHA-in thla thum chhunga CAA rules siam turin hriattir

Ministry of home affairs (MHA) chuan kumin January 10-a hman tak Citizenship Amendment Act (CAA), 2019 rules siam turin Parliament-a department related standing committee-te chu a hriattir. 

Sawisel hlawh tak he CAA-a rules  hi thla thum chhunga peih hman turin standing committee-te chu MHA chuan a hriattir a, Parliamentary Work-a manual-a a landan chuan president-in he Act a pawm hnua thla ruk chhunga rules hi siam tur a nih thu tarlan a ni. Hemi hunchhunga siam zawh hman a nih loh chuan standing committee chuan a hun chhung hi an dil belh thei a ni. 

Hun tiam chhunga rules siam zawh hman a nih loh chhan hi senior officer ṭhenkhat chuan ministry-a hnathawh tur tam tak a awm avanga a nih thu an tarlang a, rules hi a rang lama siam zawh thuai a nih tur thu an tarlang bawk. 

CAA hi nikum Decem­ber 9 khan Lok Sabha-ah pass a ni a, Dec. 11 khan Rajya Sabha-a pass a ni ve leh. Dec. vek ni 12 khan president Ram Nath Kovind chuan a hming a sign hnan nghal a ni. 

CAA-ah hian Pakis­tan, Afghanistan leh Bangladesh-a Hindu, Sikh, Buddhist, Jain, Parsi leh Kristian sakhua vuantute chu India khua leh tui nih theihna tur a chuang a, Muslim erawh an tel ve lo. Heng sakhua vuantute hi an awmna rama tihduhdah an nih chuan India khua leh tui nih theihna an rawn ngen thei a ni.