NEP-ah China ṭawng telh ve lo

Kar liam ta Nilainia prime minister Narendra Modi kaihhruai union cabinet meeting-in a pawm tak National Education Policy (NEP) tharah China ṭawng chu paih a ni. Ramchhunga secon­dary school level china zirlaiten elective atana an thlan theih ram hrang hrang ṭawng zir theih tur list an siamah hian China ṭawng hi paih a ni. 

Nikuma NEP draft an siamah khan China ṭawng hi telh a ni thung. Mahse NEP tharah hian China ṭawng hi paih a ni a, French, German, Japanese, Korean, Spa­nish, Portuguese, Russian leh Thai ṭawngte chu zirlaite hian elective atan an thlang thei dawn a ni. India-a zirlaiten elective an lak theih tur aṭanga China ṭawng NEP aṭanga paih a nih chhan hi tun hnaia ramri chungchanga China nen an intihthiam loh vang a ni a, India leh China hi hman aṭang tawh a ramri chungchanga an inngeih lohna chu tunhnai khan a zual kai hle a, hei vang hian India chuan kawng hrang hrangin China chu dodal a tum zel niin a lang.

Tamil Nadu sorkar chuan NEP thara three-language formula telh chu an pawm ve dawn lo tih a sawi. Chief minister Edap­padi K Palaniswami chuan he formula thar hi thil pawi tak a ni tiin, a kaihhruai sorkar chuan a zawm ve dawn lo tih a sawi. Prime minister Narendra Modi hnenah pawh Tamil mipuite rilru ngaihtuahpui a, anmahni ṭawng ngei an zir chu phalsak turin a ti. 

State sorkar bakah an state-a party lian dangte pawhin two-language policy kalpui chu an duh zawk vek tih a sawi bawk. Tamil Nadu hian two-languate policy (English-Tamil) a kalpui a, hei hi chhunzawm zel an tum tih a sawi a ni.