Income Tax Dept-in Delhi leh Mumbai-a BBC office an dap

BBC-in kum 2002-a Gujarat-a intualvuakna thleng leh, hetih hunlaia Gujarat chief minister Narendra Modi inhnamhnawih dan chungchang documentary a tichhuah hnuah, nimin khan Income Tax department chuan New Delhi leh Mumbai-a BBC office an dap.

IT department hian company sumdawnna hmun bik dapin, an hotute chenna leh hmun dang erawh an dap tel lo nia sawi a ni.

BBC-in India-a sumdawnna a kalpui dan chungchang document an zawng niin an sawi a, an office an dap pawh hi BBC subsidiary company-te chhiah awl kaihhnawih thil niin an sawi bawk.

Sawi lawk loin IT official-te hian nimin chawhma dar 11 khan Delhi leh Mumbai-a BBC office hi an dap a, office-a thawkte chu an computer leh phone-te hmang lo turin an hriattir a ni. Chawhnu lama thawk ho pawh in lam aṭanga thawk tura hriattir niin, an dap lai hian office-a awm sate chu chhuah phalsak an nih lo bakah, midang luh pawh phal a ni lo bawk.

BBC hian thla liam ta khan documentary, 'India : The Modi Questioni' chu a tichhuak a, hei hi central-a BJP sorkar chuan na taka sawisel nghalin, India rama tihchhuah a khap zui a ni. Twitter leh YouTube lamah a link lo dah tawhte pawh a lakthlak tir leh vek bawk.

Rights activist-te chuan BJP sorkar thiltih dan hi an dem a, prime minister Narendra Modi kaihhruai sorkar a din hnuah, India rama press mite zalenna nekchep a ni chho zel tih an sawi.

Reporters Without Borders-in World Press Freedom Index a tihchhuahah, central-a BJP a sorkar hma, kum 2014-a India-in 10-na dinhmun a hauh chu, survey thar berah chuan 150-a tla thla tawh a ni.

Congress party chuan IT department chet danah sorkar laipui chu bei zui nghalin, chhiah chungchang vang niin sawi mah se BBC documentary siam kaihhnawih thil vang niin a puh.

Adani buaina chungchanga Joint Parliamentary Committee (JCP) chhui tir tura an phut laiin, sorkar chuan BBC zawk a umzui a ni, an ti. Modi-a kaihhruai sorkar chuan sawisel a huatzia a tilang a ni, tiin Congress general secretary Jairam Ramesh chuan a sawi.