Kum 5 chhungin Russia aṭangin ralthuam USD tld 13 hu lei

Russia state news agency-ten an tarlan danin, India chuan kum nga chhungin Russia aṭangin ralthuam, USD tluklehdingawn 13 hu vel a lei. Sipai hmanrua leh ralthuam order USD tld 10 chuang a awm mek bawk niin a sawi.

India hi Russai ralthuam leitu lian ber niin, Russia-in order a hmuh aṭanga 20% vel hi India hnen aṭanga a hmuh a ni.

Russia federal service of military technical cooperation-a hotu, Dkitry Shuayev chuan, "Russia-in Ukraine rama special operation a kalpui avangin US kaihhruai khawthlang ramte chuan India chu Russia a thawhpuina titawp turin nawr mah se, India ram chu military-technical cooperation lama Russia thawhpui ram pawimawh ber zinga mi a la ni reng a ni," a ti. Russia-in kum tina ralthuam a thawnchhuah hi USD tld 14-15 hu vel a tling ṭhin nia sawi a ni bawk.

Ukraine-a indona thleng mek chungchangah, India hian Russia ram chet dan demna thu na tak a la chhakchhuak lo a, prime minister Narendra Modi chuan ram pahnihte chu an buaina chingfel tura inbiakna nei turin a ngen a ni.

Thawhṭanni aṭanga Bengaluru-a neih ṭan, kar khat awh tur international aerospace exhibition, Aero India 2023-ah Russia chuan sipaite hmanrua leh ralthuam sample 200 vel pek a tum thu a lo sawi tawh bawk.