Air India-in thlawhtheihna 470 leina tur order siam

Tata Group hnuaia mi, Air India chuan Airbus leh Boeing hnenah thlawhtheihna 470 leina tur order siamin, hei bakah hian kum 10 chhunga aircraft 370 lei belh theihna tur pawh a siam tel bawk. Hei hi Indian aviation history-a order siam lian ber a ni tih airline official chuan a sawi.

Air India chief commercial and transformation officer, Nipun Aggarwal chuan airline-in Airbus hnenah aircraft 250 leh Boeing hnenah aircraft 220 leina tur order hi a tifel tawh tih sawiin, an airline order siam chungchang khawvelin a lo ngaihvenpui chuan a tiphur hle tih a sawi bawk.

"Firm aircraft 470 leina tur order siam niin, a bak 370 purchase rights pawh Airbus leh Boeing aṭangin lak tum a ni bawk," a ti. Airbus firm aṭanga an order hi A320/321 Neo/XLR aircraft 21- leh A350-900/1000 aircraft 40 niin, Boeing firm hnenah hian 737-Max 190, 787s 20 leh 777s 10 an order bawk a ni. Engine enkawl zuina turin CFM International (CFM), Rolls-Royce leh GE Aerospace chu inremna an siampui bawk niin an sawi.

Air India hian kum 17 chuang hnua order a siam lehna hmasa ber a ni a, A350 thlawhtheihna hmasa ber chu kumin kumtawp lamah an dawn hman beisei a ni. An order siam hnuhnung ber chu kum 2005-ah khan niin, hemi ṭum hian thlawhtheihna 111 - Boeing aṭangin 68 leh Airbus aṭangin 43 an order a, USD tld 10.8 hu a tling.

Sorkar laipui hnuaia awm ṭhin, Air India hi kum 2022, January thla aṭang khan Tata Group-in a la chhawng a ni.