2021-22 chhungin national party-te donation dawn 31.5% in a pung

17th February, 2023

Association for Democratic Reforms (ADR) in a tarlan danin, financial year 2021-2022 chhungin national party-te donation pek chu a hma kum aiin 31.50% in a pung tih a tarlang.

Kum 2021-22 chhung khan national party-te hian donation ṭum 7,141 dawngin, cheng vaibelchhe 780.774 a tling a ni.

National party zingah BJP chuan donation hi dawng tam berin Congress party-in a dawt niin poll reform body ADR chuan a tarlang. BJP hian donation hi ṭum 4,957 dawngin, an sum dawn tlingkhawm hi Rs vbc 614.63 a tling. Congress-in ṭum 1,255 dawngin, Rs vbc 95.46 an hmu bawk. BJP sum dawn bik hi Congress, NCP, CPI, CPM, NPEP leh AITC-te sum dawn tlingkhawm aiin a let thum chuangin a tam.

Bahujan Samaj Party (BSP) chuan 2021-22 chhungin donation, Rs 20,000 chunglam a dawng lo tih a sawi.

Kum 2020-21 nena khaikhinin, BJP donation dawn hi 29.71% in a pung a, Congress party donation hi 28.09% in a pung bawk. Hetih lai hian CPI(M) chuan a kum hmasa aiin donation hi 22.06% in a dawng tlem a, National People's Party (NPP) donation pawh 40.50% in a tlahniam bawk.

Delhi khawpui aṭanga national party-te hnena donation pek hi Rs vbc 395.85 a tling a, Maharashtra aṭangin Rs vbc 105.3523 leh Gujarat aṭangin Rs vbc 44.96 pek a ni. Donation pek zinga Rs vbc 12.26 (1.57%) chu information kimchang pek a nih loh avangin khawi state/UT aṭanga pek nge tih hriat a ni lo.

National party-te hnenah donation pek zinga 2,551 chu corporate/business sector pek niin Rs vbc 625.88 (80.16%) a tling a, mimalin donation hi ṭum 4,506 pein, an pek khawm hi Rs vbc 153.33 (19.64%) a tling ve bawk.

Corporate/business sector donation pek aṭangin BJP hian Rs vbc 548.81 hmuin, mimal 2,876 aṭangin Rs vbc 65.77 an dawng bawk. Congress party chuan corporate/business sector aṭangin Rs vbc 54.57 leh mimal donor aṭangin Rs vbc 40.89 a hmu bawk a ni.

Prudent Electoral Trust chuan BJP leh Congress party tana top donor ve ve niin, BJP tan Rs vbc 336.50 a pe a, Congress party tan Rs vbc 16.50 a pe bawk tih ADR chuan a tarlang. Nuvoco Vistas Corporation Limited chuan Congress party hnenah Rs vbc 15 a pe. Pacific Exports chuan ṭum sarih a pekah BJP hnenah Rs vbc 10.50 pein, AB General Electoral Trust chuan ṭum hnih pekah Rs vbc 10 a pe bawk. Sheerji Shipping-in Rs vbc 10 pein, Yashoda Super Speciality Hospital chuan ṭum 10 a pekah BJP tan Rs vbc 10 a pe bawk a ni.