Union cabinet-in ITBP sipai 9,000 chuang lak belhna tur pawm

Prime minister Narendra Modi kaihhruaia Nilainia cabinet meeting chuan, China ramria duty tur Indo-Tibetan Border Police (ITBP) sipai 9,000 lak belhna tur a pawm.

ITBP sipai lak tharte hmang hian battalion thar pasarih leh, sector headquarters thar pakhat siam a ni ang. Border Out Post (BOP) thar 47 leh staging camp 12 siam belhin, China ramri Line of Actual Control (LAC) venhimna thawktute chu thuam chak an ni dawn a ni. Sipai lak thar hi kum 2025-26 chhunga tihfel tum a ni.

Kum 2013-14 aṭang tawh khan ITBP hian sipai lakbelh rawtna hi an thleng tawh a, battalion thar 12 din belh an rawt a ni. Hun rei tak rawtna hi tihkhawtlai a nih hnuah, battation thar pasarih zawk lakbelhna tur hi pawmsak an ni ta a ni.

India leh China ramriah hian ramri vengtu sipaite hi an intibuai fo a, kum 2020 June thla khan Ladakh khawchhak lam, Galwan Valley-ah ram pahnih sipaite hi an inbei a ni. Hemi hnu hian boruak ṭha siam tumin diplomatic leh military level inbiakna ṭum eng emaw zat neih a ni tawh a, mahse inremna mumal tak an la siam thei lo. Nikum December thla khan Arunachal Pradesh-a Tawang district-a Yangtze region-ah ram pahnih sipaite hi an intibuai leh bawk a, hliam tuar pawh eng emaw zat an awm.