Billionaire Soros-a'n PM Modi chungchang a sawina BJP-in India beihna a ni tiin an chhang let

Mi hausa tawntaw, billioinaire philanthropist George Soros-a'n Adani Group buaina neih mek chungchang a sawinaah prime minister Narendra Modi a sawisel telna chuan BJP a ti lawm lo a, India beihna a ni, an ti.

Kum 92 mi, George Soros chuan Indian sumdawng hausa, Gautam Adani-a'n stock market lama buaina a tawh chuan India ramah 'democratic revival' a ngai tih nawrtu tur niin, prime minister Narendra Modi chuan foreign investor-te hnen aṭang leh, Parliament-ah zawhna chhan tur eng emaw zat a nei ngei dawn a ni, tiin a sawi. Hei hian Modi-a dinhmun pawh a tihhniam phah dawn a, mahse institution reform-na turin kawng a hawng thei dawn a ni, a ti. India ramah democratic revival chu a thlen ngei a beisei thu a sawi zui bawk.

Soros chuan, "Modi leh sumdawng lian Adani-te hi inpawh ṭha tak an ni. Adani Enterprise chuan stock market lamah fund tihpun tumna chu a hlawhchham a ni. Stock tichingpenah puh a ni a, stock pawh a tlachhe bawk. Hemi chungchangah hian Modi chu a ngawi reng a, mahse foreign investor-te zawhna leh Parliament-ah zawhnate a la chhan ngei a ngai dawn a ni," tiin a sawi. PM Modi chu 'democrat' a ni lo tih sawi zuiin, Muslim-te laka tharum thawhna thleng chu a thlen sanna chhanah a tel a ni, a ti bawk.

BJP hruaitute chuan Soros thusawi hi an chhang nghal a, India ram democracy inrelbawlnaa ram dangte inrawlh tumnaah an puh.

Union minister Smirti Irani chuan, Soros-a thusawi chu India democracy kalphung tihchhiat tumna nia puhin, ramchhung inrelbawlnaa inrawlh tumte chu a hma pawhin India mite chuan an lo hneh tawh ṭhin, a ti. India mipuite chu Soro hi a phu ang chhanna pe let turin inlungrual turin a chah bawk.

Hetih lai hian Hinderburg Research-in Adani Group thil tih dan dik tawk lo nia sawi report a tihchhuah hnuah, Adani Group hian a hlutna, USD tld 120 hu vel a hloh tawh. An puhna hi thil dik lo a ni tiin sawi mah se, an talbuai zui phah hle.