MV Ganga Vilas cruise-in Assam a thleng

Khawvela river cruise thui ber tur nia sawi, MV Ganga Vilas cruise ship chuan Bangladesh a kaltlang hnuah nimin khan Assam a thleng.

Lawnglian hian India-Bangladesh border, Dhubri-a zero point paltlangin Dibrugarh lam a pan a, Assam khawchhak lam tawp hi March 1-ah hian a thleng ang.

January 13-a prime minister Narendra Modi-a'n Varanasi, Uttar Pradesh aṭanga a vailiam, MV Ganga Vilas hi Assam-ah hian ni 13 chhung a kal dawn a, Dibrugarh a thlen hmain Dhubri, Jogighopa, Pandu (Guwahati), Kaziranga leh Majuli-ahte an chawl ang. He cruise hian India leh Bangladesh-a state panga-a river system 27 kaltlangin, km 3,200 chuang a kal dawn a ni. Uttar Pradesh, Bihar, West Bengal leh Bangladesh-te an kaltlang tawh a ni.

Union shipping minister Sarbananda Sonowal chuan lawngah hian Switzerland mi khualzin 32 a phur tih a sawi a, an zinga 14 chu Kolkata-ah chhukin, Dibrugarh lam an pannaah lawng aṭanga chhuk zat hi khualzin dang an luh belh ve leh a ni. Dibrugarh an thlen hnuah khualzinte hi New Delhi lamah an thlawk thla thung ang. Khualzin dang 32-in lawng hmang hian Varanasi lam an pan ve leh thung dawn a ni.