EC-in Shiv Sena party hming leh symbol Shinde lamṭangte pe; Thackeray-a lamṭangten Rs vbc 2,200 sengah Shinde pawl an puh

Shiv Sena party chu Uddhav Thackeray leh Eknath Shinde lamṭang pawl pahniha an phel hnuah, kar liamta Zirtawpni khan Election Commission chuan thutlukna siamin, Maharasthra-a BJP nena ṭangrual sorkar siam mektu, chief minister Eknath Shinde lam pawlte chu Shiv Sena party hming leh symbol (bow and arrow) chhawmzui turin a ti ta.

Thackeray leh Shinde pawlte hian a ziding zawk nia inchhalin, hun rei tak party hming leh symbol neitu zawk nih inchuhin an buai tawh a ni.

Eknath Shinde hi Thackeray kaihhruai Shiv Sena aṭanga lungawi loa chhuak a ni a, mahse an party MLA tam zawkin an thlawp avangin Thackeray kaihhruai ṭangrual sorkar pawhin an tlak phah a ni. Hemi hnu hian Shinde chuan BJP chu thawhpuiin, sorkar thar an siam zui a, Chief Minister-ah awmin, BJP hruaitu Devendra Fadnavis chu deputy chief minister-ah a awm.

Shiv Sena party hi kum 1966-a Uddhav Thackeray-a pa, Bal Thackeray-a din a ni.

Election Commission thutlukna siamah Thackeray-a lamte an lungawi lo hle a, anmahni zawk chu party ziding zawk an nih thu sawiin, Supreme Court-ah pawh thlen an tum tih an sawi. An hruaitu, Rajya Sabha MP Sanjay Raut chuan EC thutlukna hi inremna siamna a ni tiin, Shinde pawl lam hian party hming leh symbol leina tur hian Rs vbc 2,000 an seng niin a puh. An puhna hi thudik a nih ngei thu leh, a finfiahna pawh a la pholan tur thu a sawi.

Mahse Shinde lam pawl chuan Raut-a puhna hi thu dik lo a nih thu an sawi thung.

Election Commission-in thutlukna a puan hnuah party hruaitute nena meeting an neihah, Uddhav Thackeray chuan an party hming leh symbol chu ruksak an ni tih sawiin, 'rukrute chu zirtirna pek an ngai dawn a ni," a ti.