IT Department-in an office an enfiah chhungin an journalist-te hna thawh an phalsak lo niin BBC-in a puh

Incomet Tax department-in kar liam taa New Delhi leh Mumbai-a BBC office dap a, a enfiah chhung khan, an journalist-te chu darkar tam tak chhung hna thawk thei loa an dan bakah, ṭhenkhat chungah phei chuang mawi lo takin an che niin, British Broadcasting Corporation (BBC) chuan a sawi.

February 14 khan IT department hian khawpui pahniha BBC office hi dapin an enfiah nghal a, darkar 60 vel zet office-ah hian an awm zui a ni. Hemi chhung hian journalist-te chu hna thawh phal loin an dang tih BBC Hindi wesbite-a article tihchhuahah tarlan a ni. Hei hi Central Board of Direct Taxes (CBDT) thuchhuah lo siam tawh, survey operation chu media/channel hnathawhte tibuai lo a, pangngai taka an thawh chhunzawm zel theih dan tura kalpui a ni, tia a lo tarlan nen an inkalh hle a ni.

Article-ah hian IT official-te chuan BBC journalist computer-te chu enfiahin, an phone-te an laksak bakah, an hnathawh dan kalphungte pawh an awt tih a tarlang. Delhi office-a journalist-te phei chu survey chungchang hi engmah an ziah phalsak an ni lo bawk, tiin a tarlang.

BBC-in kum 2002 Gujarat intualvuakna thleng chungchang leh, hetih hunlai chief minister Narendra Modi inhnamhnawih theih dan documentary a siam, 'India : The Modi Question' chu central-a BJP sorkar chuan na taka sawiselin, India ramah tihchhuah a khap nghal a ni. Hemi hnu lawkah BBC office dapsak an ni zui bawk. Sorkar lam chuan chhiah an pek dan kaihhnawihah office hi dap a ni tiin sawi mahse, mi tam tak chuan PM Modi sawiselna lam hawi an siam kaihhnawih thil zel niin an ngai. PM Modi leh BJP sawiseltute beih let nan sorkar laipui chuan central agency-te a hmang fo niin an puh.