ED-in Chhattisgarh-a Congress hruaitute chenna in an dap; Dik lo taka central agency hmangah Congress-in BJP an puh

Enforcement Directo­rate (ED) chuan nimin khan Congress sorkarna, Chhattisgarh state-a Congress party hruaitu ṭhenkhatte chenna in chu lungalhthei chhiah pek dana eirukna thleng nia sawi kaihhnawihah an dap.

Chhattisgarh chief minister, Congress party hruaitu Bhupesh Baghel chuan state khawpui, Raipur-ah Congress party roreolna sang, plenary session neih tura inbuatsaihna kal mek laia central agency-te chet dan chu sawiselin, Bharat Jodo Yatra hlawhtling taka neih a nih hnu leh, Adani Group dik lohna puanzar a nih hnua BJP mangang chetchhuahna niin a puh. He thil hi BJP-i'n boruak dang siam an tumna hmanrua a ni a, mahse ram pumin thil dik tak chu an hre vek a ni tiin, party hruaitute beih an nih hian an rilru a tihhnual phah dawn lo a, chak takin an bei let ve zel dawn tih a sawi.

Congress party chuan ED chetdan chu 'third-rate politics' tia puhin, Congress 85th plenary session neih tur chu BJP chuan hlauthawngin, central agency-te dik lo taka hmang ṭangkai lehin, tihbuai tumin hma an la leh a ni, an ti. BJP chuan politics lama an khingpuite an duh anga an hneh theih loh chuan central agency, ED leh CBI-te chu hmanruaah an hmang ṭhin a ni tiin, state Congress communication wing hotu, Sushil Anand Shukla chuan a tarlang.

Hetih lai hian ED chuan lungalhthei aṭanga chhiah lak tam tak chu dik lo taka political party hruaitute kutah a lut niin an sawi a, hemi kaihhnawihah hian nimin khan hmun 17 an dap a ni. An dap zingah hian Congress MLA Devendra Yadav, Chhattisgarh Congress treasurer Ramgopal Agrawal, Congress spokesperson RP Singh leh building workers' welfare board chairman Sushil Sunny Agrawal-te in pawh a tel.