Bihar : JD(U) hruaitu hlui Kushwaha-a'n party thar din

Bihar-a rorellai, Janata Dal United hruaitu hlui, Upendra Kushwaha chuan chief minister leh JD(U) hotu lu ber, Nitish Kumar nen an intihthiam loh hnuah political party thar a din.

Upendra Kushwaha chuan nimin khan a party din thar, Rashtriay Lok Janata Dal chu a tlangzarh a, party national president atana ruat a nih nghal thu a sawi. An party chuan ṭangrual sorkar siam dawna JD(U) in Rashtriya Janata Dal (RJD) inremna an lo siampui tawhte ṭhiah tumin hma an la dawn tih a sawi bawk a ni.

Kushwaha hi Rashtirya Lok Samata Party (RLSP) hruaitu ni ṭhinin, kum 2021 khan an party hi JD(U) ah an inchhung lut a, JD(U) national parliamentaryboard president-ah a awm zui a ni. Mahse JD(U) hotu Nitish Kumar-a'n kum 2025 assembly inthlan awm turah ṭangrual pawl chu RJD hotu, Tejashwi Yadav-an a kaihruai dawn tih a puan aṭangin an inkar boruak hi a ṭha lo chho a, tun hnaiah BJP hruaitute pawh a dawr nia sawi a ni. Nitish Kumar chu a intiam anga kal lo leh, amah hnaihtute thurawn ang apianga kalah Kushwahah chuan a puh. Hemi hnu hian JD(U) a chhuahsan thu sawiin, political party thar a din zui ta nghal a ni.

Party thar tlangzarh rual hian, Kushwaha chuan ni hnih awh tur meeting a ko nghal a, meeting-ah hian amah thlawptu, JD(U) mi leh sa 5,000 vel an kalkhawm niin a sawi.