Shiv Sena chungchanga EC thutlukna siam Uddhav Thackeray-a'n Supreme Court-ah a khing

Election Commission of India-in Shiv Sena party hnuaia Maharashtra chief minister Eknath Shinde lamṭang pawlte an party hming leh symbol chhawm zui tura thutlukna a siam chungchangah, Uddhav Thackeray chuan nimin khan Supreme Court-ah petition a thehluh.

Eknath Shinde leh Uddhav Thackeray lamṭang pawl pahniha Shiv Sena hi a phel hnuin, party ziding zawk nia insawi ve vein, party hming leh symbol chhawmtu zawk nih inchuhin hun rei tak an buai tawh a ni. Kar liam ta khan Election Commission chuan an buaina chungchangah thutlukna siamin, Shinde pawl lamte chu Shiv Sena party dik tak zawkah a pawm a ni.

EC thutlukna siam chungchangah Thackeray lamṭangte hi an lungawi lo hle a, nimin khan Thackeray chuan EC thutlukna hi a khing let a, a aiawhtu senior advocate chuan chief justice of India DY Chandrachud kaihhraui bench-ah thlenin, petition hi ngaituah hmanhmawh tur zinga telh turin a ngen. Mahse bench chuan hemi chungchangah hian order a la siam lo.

Uddhav Thackeray chuan Election Commission chu ṭhiah a ngai a ni tiin, election commissioner tur pawh sorkarin ruat loin, mipuite'n an thlan a ngai tawh zawk a ni, a ti. Party chhunga buaina awmah, pawl pakhat lama party hming leh symbol pek vekna ang hi a la thleng ngai lo tiin a sawi zui. Election Commission thutlukna siam hmang chuan a thil neih zawng zawng chu ruksak a ni, a ti. BJP chu democratic institution puihna hmanga India ram democracy sawisa leh tichhiaah puhin, eptu hruaitu dang - Mamata Banerjee, Sharad Pawar, Nitish Kumar leh hruaitu dang dangte hnena aṭang thlawpna a dawn thu a sawi.

"Vawiina BJP-in kan chunga a thiltih ang hi midang chungah pawh a ti thei reng a ni. Hetianga an chet chhunzawm zel chuan, kum 2024 hnu lamah chuan India ramah democracy emaw, inthlan emaw a awm thei tawh lo ang," tiin Thackeray chuan a sawi. Election Commission chu thutlukna siam chungchang hmanhmawh taka kalpuiah puhin, MLA-te disqualify an nih leh nih loh chungchanga Supreme Court thutlukna pawh an nghak ve phawt tur a ni, a ti.